Një zjarr i madh ka përfshirë tregun e rrobave të përdorura në Shkodër pasditen e 14 qershorit 2024, dhe është konsideruar si zjarri më i madh në 20 vitet e fundit. Shefi i repartit të zjarrfikësve, Bashkim Ramaj, njoftoi se për shuarjen e flakëve janë angazhuar jo vetëm zjarrfikësit lokalë, por edhe forcat zjarrfikëse nga Ulqini dhe Tivari. Shtatë mjete zjarrfikëse janë sjellë menjëherë në vendngjarje, ndërsa kanë asistuar gjithashtu ekipet e zjarrfikësve nga qarku i Lezhës dhe Malësisë së Madhe.

Rama theksoi se situata ishte e vështirë për shkak të intensitetit të lartë të zjarrit, gjë që nuk është parë në dy dekadat e fundit. Një problem serioz që pengoi ndërhyrjen e zjarrfikësve ishte parkimi i parregullt i makinave, dhe Ramaj bëri thirrje për ndërgjegjësimin e qytetarëve që të mos parkojnë vend e pa vend, veçanërisht në raste emergjente.

Tregtarët e prekur nga zjarri kanë bërë thirrje për ndihmën e shtetit për të rikthyer tregun dhe për të dalë nga situata e vështirë. Disa prej tyre shprehën dëshpërimin e tyre për humbjen e të gjithë mallrave dhe investimeve të tyre.

Një tregtar tha: “Kemi 22 vite që tregtojmë këtu. Na është djegur i gjithë malli që kishim aty, çdo gjë është shkrumbuar.”

Një tjetër tregtar kërkoi ndihmën e shtetit: “Të gjitha taksat i kemi paguar, kemi hedhur miliona këtu. Shyqyr që kemi shpëtuar vet, por shteti të mendoj sepse e kemi bukën e gojës. Një ditë pa punë, një ditë pa bukë. Jemi nga shtresë e lodhur, e kemi me djers dhe me gjak. Vini dorën në zemër për këto familje që janë në hall sot.”

Tregtarët kërkojnë ndërhyrje të menjëhershme nga autoritetet për të rikthyer tregun dhe për të mbështetur familjet e prekura nga kjo fatkeqësi.