Kandidatja për kryetare bashkie e Partisë Socialiste në Vlorë, Bruna Mersini, zhvilloi dje një takim me gra vlonjate nga fusha të ndryshme, në kuadër të aktiviteteve për Tetorin Rozë, muajin ndërgjegjësues për parandalimin dhe kontrollin e kancerit të gjirit.

“Nëse do më pyesnin cila është zona ime e komfortit në jetë, do të thoja: ndërmjet grave. Aty ku forca, ndjeshmëria dhe dashuria marrin formën më të bukur,” – tha Mersini, duke theksuar rëndësinë e solidaritetit dhe kujdesit për shëndetin.

Fushata e saj në Vlorë po pasurohet çdo ditë me takime dhe kontakte me komunitete të ndryshme, duke nënvizuar pjesëmarrjen aktive qytetare dhe përfshirjen e grave në jetën publike.

“Ky muaj është një kujtesë e fuqishme për kujdesin ndaj vetes, për kontrollin e shëndetit, dhe për solidaritetin mes nesh. Le të jemi zëri dhe kujtesa e njëra-tjetrës,” – shtoi Mersini.

Takimi i djeshëm tregon fokusin e fushatës së saj te komunitetet lokale, veçanërisht te gratë, si pjesë e strategjisë për të forcuar lidhjen me qytetarët dhe për të promovuar vlerat e kujdesit, bashkëpunimit dhe pjesëmarrjes qytetare në Vlorë.