Sanae Takaichi ka hyrë në histori pasi siguroi votat e nevojshme në të dyja dhomat e parlamentit japonez, duke u bërë kryeministrja e parë femër e Japonisë. Ajo mori 237 vota në Dhomën e Ulët, katër më shumë se shumica e thjeshtë e nevojshme, duke përforcuar kështu një mandat të fortë politik.

Votimi erdhi pas dorëheqjes së ish-kryeministrit Shigeru Ishiba dhe pas një marrëveshjeje të re koalicioni brenda Partisë Liberal Demokrate (LDP), të cilën Takaichi e drejton aktualisht. Zgjedhja e saj shënon një zhvendosje të dukshme drejt së djathtës, pasi ajo njihet për qëndrimet e forta konservatore dhe politikat e linjës së ashpër.

E lindur në prefekturën Nara në vitin 1961, Takaichi vjen nga një familje e zakonshme – me një baba punonjës zyre dhe një nënë oficere policie. Frymëzimin për politikën e mori gjatë viteve 1980, në periudhën e tensioneve tregtare SHBA–Japoni, çka e shtyu të angazhohej aktivisht në jetën publike.

Karrierën e saj politike e nisi në vitin 1996, kur fitoi për herë të parë një vend në parlament me LDP-në. Që prej asaj kohe është rizgjedhur 10 herë, duke ndërtuar një karrierë të gjatë dhe ndikim të fuqishëm brenda partisë.

E cilësuar nga mbështetësit si “Zonja e Hekurt e Japonisë”, Takaichi është shquar për qëndrime të forta kundër martesave të të njëjtit seks dhe për kundërshtimin e reformave ligjore që do t’u lejonin çifteve të martuara të mbanin mbiemra të ndryshëm – një çështje që ka ngjallur debat të gjerë në shoqërinë japoneze.

Ajo ka qenë gjithashtu kritike ndaj politikave të imigracionit, duke premtuar masa më të ashpra për zbatimin e ligjit, në një kohë kur Japonia po përballet me numra rekord emigrantësh dhe vizitorësh.

Përtej politikës, Takaichi njihet edhe për pasionin e saj për muzikën heavy metal – dikur ishte bateriste dhe është rrëfyer se shpesh “thyen shkopinjtë nga energjia e performancave”.

Pas dy përpjekjeve të dështuara për të marrë drejtimin e LDP-së, ajo më në fund arriti të zgjidhet udhëheqëse e partisë, duke u konfirmuar sot nga parlamenti si kryeministrja e re e Japonisë — një figurë që pritet të luajë rol kyç në drejtimin politik të vendit në vitet e ardhshme.