Bashkimi Evropian (BE) ka bërë thirrje që Serbia të ndërmarrë veprime konkrete për të siguruar që personat e dyshuar për sulmin vdekjeprurës ndaj Policisë së Kosovës në fshatin Banjskë, në veri të Kosovës, të përballen me drejtësinë. Ky incident ndodhi më 24 shtator të vitit të kaluar, kur një grup serbësh të armatosur sulmoi Policinë e Kosovës në fshatin Banjskë, pjesë e komunës së Zveçanit, duke vrarë rreshterin Afrim Bunjaku. Gjatë përleshjeve të mëvonshme u vranë edhe tre nga sulmuesit serbë.
Qeveria e Kosovës e ka cilësuar këtë akt si një sulm terrorist dhe e ka akuzuar Serbinë për përfshirje të drejtpërdrejtë, akuzë të cilën Beogradi e mohon. Prokuroria Speciale e Kosovës, në fillim të këtij muaji, ngriti një aktakuzë kundër 45 personave për rolin e tyre në këtë sulm, duke përfshirë edhe përgjegjësit kryesorë.
Ish-nënkryetari i Listës Serbe, Millan Radoiçiq, ka marrë përgjegjësinë për sulmin, duke u cilësuar nga autoritetet kosovare si “kreu i grupit terrorist” në aktakuzën e Prokurorisë së Kosovës. Pavarësisht kësaj, Serbia ka refuzuar të ekstradojë Radoiçiqin në Kosovë, duke këmbëngulur se ai do të gjykohet në gjykatat serbe. Ndërkohë, autoritetet e Kosovës kanë denoncuar se Serbia po i ofron mbrojtje atij.
BE-ja, përmes zëdhënësit të saj Peter Stano, ka nënvizuar se Serbia duhet të bashkëpunojë plotësisht me Kosovën në hetimin dhe ndjekjen e këtij sulmi, si dhe në çështje të tjera që përfshijnë dhunën kundër forcave të KFOR-it, mediave dhe qytetarëve gjatë trazirave në veri të Kosovës më 29 maj të vitit të kaluar.
“BE-ja, në mënyrë të përsëritur, ka shprehur pritjet që Serbia duhet të bashkëpunojë plotësisht dhe të ndërmarrë të gjitha masat e domosdoshme për të kapur dhe për t’i sjellë shpejt para drejtësisë kryesit e akteve të dhunës nga ana e protestuesve serbë të Kosovës ndaj qytetarëve, pjesëtarëve të KFOR-it, organeve të rendit dhe mediave, më 29 maj të vitit 2023. Gjithashtu, edhe për sulmet e dhunshme më 24 shtator 2023 në veri të Kosovës”, tha ai.
Stano theksoi se Serbia duhet të ndërmarrë hapa të qartë për të sjellë para drejtësisë autorët e këtyre akteve të dhunshme. Ai përmendi gjithashtu edhe sulmet e tjera, përfshirë ato ndaj gazetarëve që raportuan nga veriu i Kosovës gjatë tensioneve në komunat me shumicë serbe në maj të vitit të kaluar.
Tensionet në veri të Kosovës janë intensifikuar që nga 26 maji 2023, kur kryetarët shqiptarë të rinj të komunave u vendosën në ndërtesat komunale me ndihmën e Policisë së Kosovës, duke shkaktuar reagime të dhunshme nga serbët lokalë. Përplasjet arritën kulmin më 29 maj, kur protestuesit serbë u përleshën me pjesëtarët e KFOR-it në Zveçan, duke shkaktuar lëndimin e rreth 100 ushtarëve të misionit ndërkombëtar të paqes.
