Në një intervistë të ndjerë për gazetën El País, Jennifer Lopez ka zgjedhur të flasë për ndarjen nga aktori Ben Affleck jo me dramë, por me një reflektim të thellë dhe të maturuar – si grua, nënë dhe artiste që ka kaluar një nga vitet më sfidues të jetës së saj.

55-vjeçarja, e cila është nënë e binjakëve Max dhe Emme, tha se forca për të përballuar gjithçka ka ardhur nga një premtim i bërë pikërisht atyre.

“U premtova atyre se do e kaloja dhe do të dilja më e mirë nga kjo periudhë. Dhe e bëra,” u shpreh ajo me vendosmëri.

Viti i kaluar nuk ka qenë vetëm periudha e një ndarjeje për Lopez. Ai u shënua gjithashtu nga anulimi i turneut të saj dhe një përballje e thellë me veten dhe emocionet e grumbulluara ndër vite. Por, në vend që të mbyllej në vetvete, Jennifer zgjodhi përballjen: përmes meditimit, introspeksionit, terapisë dhe një zhytjeje të sinqertë në arsyet që e bëjnë dhimbjen të përsëritet.

“Jo marrëdhënia, jo burri – por mënyra si e përballon dhimbjen është ajo që të përkufizon,” theksoi ajo.

Fjalët e saj pasqyrojnë një maturi të re, një J.Lo që nuk kërkon më të mbushë boshllëqet me histori dashurie, por që ka gjetur qetësinë në veten e saj. Ajo ndjehet më e lumtur, më e vetëdijshme dhe më pak e varur nga pritshmëritë e të tjerëve.

“Nuk kam më nevojë për miratimin e askujt”, thotë ajo me qartësi.

Në një botë ku shumë gra publike përballen me ndarje mes zhurmës së mediave dhe paragjykimeve, Jennifer Lopez zgjedh të jetë ndryshe: e sinqertë, e brishtë dhe e fortë njëkohësisht.