Një 21-vjeçar është ndaluar nga policia e Korçës në një rast të rëndë që lidhet me marrëdhënie seksuale me të mitur. Ditën e djeshme, në maternitetin e Korçës, është paraqitur një vajzë 14-vjeçare që ka lindur një fëmijë. Pas hetimeve, 21-vjeçari D.K., banues në Korçë, pranoi se ishte babai i fëmijës.

Komisariati i Policisë Korçë ka ndaluar D.K. për veprën penale “Marrëdhënie seksuale ose homoseksuale me të mitur”. Në përputhje me njoftimin e policisë, 21-vjeçari është arrestuar pas deklaratave të marra nga specialistët për Hetimin e Krimit, të cilat konfirmuan se ai ishte babai i fëmijës.

Vajza 14-vjeçare është në shëndet të mirë dhe lindja është kryer natyrshëm. Sipas burimeve nga spitali dhe gazetarit Armand Braho, çifti, që janë pjesë e komunitetit egjiptian, kishin një “fejesë” prej një viti dhe ishin të njohur nga të dyja familjet.

Nga burimet spitalore, thuhet se 14-vjeçarja është paraqitur në maternitet me 21-vjeçarin dhe ata kanë pohuar se kanë pasur një marrëdhënie të rregullt. D.K. e ka pranuar gjithashtu përpara policisë se është babai i fëmijës.

“Kam një vit që njihem me bashkëshortin. Jemi njohur në Elbasan. Ju thashë edhe prindërve të mo. Ata ranë dakord dhe kam një vot me të. Kam një fëmijë, përse ta arrestojnë. Ai s’më ka marrë me zor. Dua që të lirohet burri im, kush do më ushqejë mua po fëmijën tim?! Dua të ma lironi që sot. Unë s’kam si të jetoj, unë vetëm atë kam, një krah pune kisha. Punonte ai që më sillte për të ngrënë më shtëpi. Punonte dy punë edhe ditën edhe natën për të më sjellë bukë në shtëpi. Dua të ma lirojnë. Më kanë ardhur mami me babin nga Miloti, unë s’kam dhënë asnjë deklaratë në polici, por që dje jam njoftuar për burrin që e kam në polici”, tha e mitura.

Ndërkohë, edhe nëna dhe babai i 14-vjeçares kërkojnë lirimin e babait të fëmijës.

“Ka dashuruar vajza edhe ne kemi rënë dakord. Dua që dhëndri të dalë sa më shpejt. Ne kështu jemi martuar, të vogla. Edhe unë jam martuar 12 vjeç. Për ne nuk është problem mosha, ne në racën tonë martohemi të vogla. Vajzën tonë e kemi martuar me dëshirë. Ne jemi nga Elbasani dhe e kemi martuar vajzën në Korçë me dëshirë. Dua të dalë dhëndri sa më shpejt. Ai punon dhe mban nusen. Kur ka lindur është njoftuar policia për rastin. Në spital e ka shoqëruar vajzën bashkëshorti”, shprehet nëna e vajzës.

“Jam babai i vajzës. Vajza është martuar me dëshirë, me nënë me babë i kemi dhënë leje që e martova në Korçë se unë jam nga Elbasani. Dhëndri nuk e mori me zor. Pasi ka lindur goca patëm probleme se më kanë marrë dhëndrin në polici. Vajza ka gati një vit e gjysmë e martuar. Dua që dhëndri të lirohet një orë e më parë se ne jemi romë dhe raca rome martohen të vegjël. Ja ku i kam unë kam 6 fëmijë. Unë vajzën time e martova, por shteti që hyn në këtë punë është pa arsye. Unë i them shtetit që të më lirojë dhëndrin. Erdha nga Miloti me familjen, këtu e kam dhe gocën dhe i them shtetit të më lirojë dhëndrin”, shprehet babai.

Policia është duke kryer të gjitha procedurat e nevojshme për këtë rast.