Infrastruktura e pagesave në Shqipëri, që përfshin ATM-të, terminalet POS, home banking dhe sistemet ndërbankare si AIPS, ka përpunuar një volum prej 18.1 trilionë lekësh gjatë vitit 2025. Sipas të dhënave më të fundit nga Banka e Shqipërisë, kjo shumë është rritur me 1.74 trilionë lekë ose 10.7% më shumë krahasuar me vitin 2024.

Rritja e volumit të transaksioneve përmes ATM-ve, POS-eve, home banking dhe sistemeve ndërbankare tregon një zhvendosje të qartë nga përdorimi i parasë fizike drejt kanaleve digjitale. Qytetarët dhe bizneset po kryejnë gjithnjë e më shumë pagesa me kartë, përmes telefonit apo transferta bankare, duke reduktuar përdorimin e cash-it.

Ky zhvillim konsiderohet një tregues i formalizimit dhe modernizimit të ekonomisë, pasi pagesat elektronike regjistrohen automatikisht në sistemin bankar, duke rritur transparencën, sigurinë dhe shpejtësinë e transaksioneve.

Zgjerimi i infrastrukturës ka qenë një faktor kyç në këtë rritje. Gjatë vitit 2025 janë shtuar 6,782 terminale të reja POS në të gjithë vendin, rreth 28% më shumë krahasuar me vitin 2024. Për herë të parë, blerjet përmes terminaleve POS në dyqane dhe biznese kanë kaluar pragun e 100 miliardë lekëve, duke arritur në rreth 106 miliardë lekë – një rekord historik për sistemin e pagesave në vend.

Nga ana tjetër, rrjeti i bankomateve ka pasur një zgjerim më modest, me vetëm 80 ATM të reja gjatë vitit të kaluar. Megjithatë, depozitimet cash në ATM kanë shënuar një rritje të ndjeshme prej 110%, duke kaluar nga 50 miliardë lekë në rreth 105 miliardë lekë, çka tregon një orientim më të madh të qytetarëve drejt përdorimit të shërbimeve automatike bankare.

Në vijim, pritet të zbatohet sistemi i pagesave të shpejta (instant payment), i cili do të mundësojë kryerjen e pagesave me QR code në dyqane. Së bashku me uljen e komisioneve për terminalet POS gjatë këtij viti, këto masa pritet të reduktojnë kostot për bizneset dhe të nxisin më tej përdorimin e pagesave elektronike në vend.