Një 19-vjeçar është dënuar me dy vjet e gjysmë burgim nga një gjykatë rajonale në Samarkand të Uzbekistanit, i akuzuar për koment fyes ndaj presidentit të vendit, Shavkat Mirziyoev, në rrjetet sociale.

Iskandarov u akuzua se e kishte fyer presidentin duke komentuar në një video të familjes presidenciale, anëtarë të cilës zënë pozita politike dhe biznesore me ndikim apo fitimprurëse në regjimin klanor, të postuar në rrjetin social Instagram.

Mirziyoev fitoi një mandat të ri shtatëvjeçar në zgjedhjet e pasfiduara në korrik. Në gusht, emëroi vajzën e vet, Saida Mirziyoev, si sekretare të presidentit. Saida, 38 vjeçe, u bë personi i dytë në administratën presidenciale pas babait të vet Shavkat Mirziyoev. Pozita e saj si sekretare është e barabartë me pozitën e shefit të administratës së presidencës.

Iskandarov u dënua më 26 tetor për “fyerje apo përgojim të presidentit në publik”. Thuhet se ai ka fshirë komentin në Instagram pasi ishte paralajmëruar nga të afërmit e vet për rrezikun e mundshëm. Ai është më i fundit nga së paku tre uzbekë që janë dënuar në vitin e fundit në bazë të klauzolës penale për fyerje apo përgojim të presidentit.