Një 31-vjeçar shqiptar ka marrë një dënim prej 7 vitesh e 6 muajsh burg në Linz, Austri, për trafik droge në shkallë të gjerë. Arrestimi i tij ka ardhur pas një operacioni të madh hetimor nga Europol, ku oficerët arritën të përgjonin komunikimet e mijëra personave të përfshirë në rrjete të trafikut.

Sipas mediave të huaja, bisedat e siguruara përmes aplikacionit Sky ECC rezultuan në më shumë se 1000 arrestime në Linz. Aktakuza ndaj 31-vjeçarit shqiptar e akuzon atë për trafikimin e më shumë se 116 kilogramëve marijuanë, 35 kilogramë kokainë, 3 kilogramë speed dhe 1 kilogram metamphetamine.

Dëshmitë tregojnë se ai ose e merrte drogën vetë gjatë udhëtimeve të shumta nga Shqipëria, Holanda ose Gjermania, ose kishte bashkëpunëtorë që ia sillnin. Ai përdorte një makinë të modifikuar me ndarje të fshehura për të transportuar drogën, të cilën më pas e shiste në tregun austriak.