Një 54-vjeçar shqiptar ka mbetur i plagosur rëndë gjatë një tentative grabitje në Portugali. Ngjarja ka ndodhur në qytetin Valença, në argjendarinë “Cacho”, e cila ndodhet në Avenida Miguel Dantas. Pesë persona, të cilët dyshohej për lidhje me ngjarje kriminale në Portugali dhe Spanjë, kanë tentuar të grabisin argjendarinë, duke goditur në kokë një prej dy vëllezërve pronarë të saj.

Grupi i grabitësve ishte nën vëzhgimin e agjentëve të Policisë së GNR dhe një prokurori, të cilët kishin informacion për aktivitete të dyshimta të tyre. Sapo grabitësit kanë tentuar të realizojnë grabitjen, policia dhe prokurori kanë ndërhyrë menjëherë. Gjatë ndërhyrjes, policia ka hapur zjarr në ajër, ndërsa njëri nga grabitësit ka kërcënuar prokurorin me një shufër hekuri. Si pasojë, prokurori ka qëlluar grabitësin në bark dhe në kyçin e dorës.

I plagosuri ka pësuar një arrest kardio-respirator, por magjistrati ka ndërhyrë me manovra reanimative, duke i shpëtuar jetën. Ai është transportuar më pas në spitalin “Viana do Castelo” dhe ka arritur të rimarrë puls. I plagosuri është identifikuar si një shtetas shqiptar 54 vjeç, me vizë qëndrimi në Maltë. Katër të tjerët janë shtetas marokenë dhe italianë, dhe të gjithë ishin të armatosur me armë zjarri gjatë tentativës së grabitjes.

Policia portugeze ka konfirmuar se hetimet vazhdojnë për të zbardhur plotësisht ngjarjen dhe për të siguruar përgjegjësinë e grabitësve.