Në mesnatë kanë mbërritur në portin e Brindizit, Itali, 7 emigrantë që ishin vendosur në kampin e Gjadrit në Lezhë. Ata udhëtuan me anijen e rojes bregdetare “Visalli”, duke nisur udhëtimin nga porti i Shëngjinit në orën 19:00. Kthimi i tyre erdhi pas një vendimi të Gjykatës së Romës, seksioni i emigracionit, që vendosi të pezullonte ndalimin e tyre dhe çështjen t’ia kalonte Gjykatës Evropiane të Drejtësisë.

Gjykata e Romës kërkoi që Gjykata Evropiane të Drejtësisë të vendosë nëse ligji italian për “vendet e sigurta” duhet të prevalojë, ligj që parashikon një procedurë automatike dëbimi, ose të aplikohet vendimi i gjyqtarëve evropianë që kërkojnë që çdo kërkesë emigranti të vlerësohet rast pas rasti.

Një grup tjetër prej 8 emigrantësh ishte mbërritur më 8 nëntor me anijen “Libra” të marinës italiane, njëri prej të cilëve u kthye për arsye shëndetësore, ndërsa 7 të tjerë u akomoduan në Gjadër. Vendimi i qeverisë italiane të udhëhequr nga Meloni, i cili ka ndryshuar listën e “vendeve të sigurta”, ende nuk është konsideruar ligjor nga gjykatat, pasi duhet të përshtatet me listën e Bashkimit Evropian.