Dy persona, babë e bir, janë arrestuar në flagrancë nga Policia e Beratit, të dyshuar për plagosjen me mjete prerëse të tre fqinjëve të tyre, gjatë një konflikti në fshatin Goriçan, Dimal.

Pas njoftimit të marrë mbi incidentin, shërbimet e Komisariatit të Policisë Berat shkuan menjëherë në vendngjarje për të parandaluar përshkallëzimin e konfliktit. Si rezultat, shtetasit Xh., 65 vjeç (i dënuar më parë), dhe E. Xh., 24 vjeç, banorë të fshatit Goriçan, u arrestuan në flagrancë.

Të dy akuzohen për veprat penale “Vrasje me dashje, e mbetur në tentativë”, në bashkëpunim, dhe “Prodhimi, mbajtja, blerja apo shitja pa leje e armëve të ftohta”.

Hetimet paraprake tregojnë se autorët kanë shkuar në banesën e fqinjit të tyre, shtetasit S. Xh., 49 vjeç, dhe pas një konflikti verbal kanë përdorur thikë dhe kosore për të plagosur këtë të fundit, bashkë me djalin e tij J. Xh., 24 vjeç, dhe të afërmin e tyre E. Xh., 18 vjeç.

Të plagosurit janë trajtuar në Spitalin Rajonal Berat dhe ndodhen jashtë rrezikut për jetën. Materialet hetimore janë referuar Prokurorisë pranë Gjykatës së Shkallës së Parë Berat për procedura të mëtejshme.