Njësitet e Policisë së Kosovës janë duke kryer kontrolle në lokacione të ndryshme në Zubin Potok pas sulmit të ndodhur në kanalin e ujit të Ibër-Lepencit. Zëvendësdrejtori i policisë për rajonin e veriut, Veton Elshani, ka deklaruar se momentalisht nuk po kryhen bastisje, por vetëm kontrolle në terrenin ku ka ndodhur sulmi. Ai shtoi se aktualisht nuk ka asnjë informacion shtesë lidhur me hetimet.

Ndërkohë, më herët gjatë fundjavës, policia kreu bastisje në disa zona të veriut, ku u arrestuan tetë persona dhe u sekuestrua një arsenal armësh. Gjatë hetimeve, u gjetën edhe simbole dhe emblema që lidhen me forcat dhe njësitë ushtarake ruse, duke ngritur shqetësime për praninë dhe mundësinë e ndikimit të grupeve pro-ruse në këtë rajon të Kosovës.

Në orët e hershme të mëngjesit të sotëm, në fshatin Varagë, afër Zubin Potokut, është angazhuar njësiti i specializuar i Policisë së Kosovës K-9, i shoqëruar me qentë e trajnuar për kërkimin e eksplozivëve. Ky aksion është pjesë e përpjekjeve për të siguruar zonën ku ndodhi sulmi terrorist dy ditë më parë dhe për të parandaluar kërcënime të mundshme të tjera.