Një 44-vjeçar, i identifikuar si A. F., është arrestuar në fshatin Brataj pas një incidenti të ndodhur mbrëmjen e djeshme, ku ai ka qëlluar me armë zjarri në ajër në gjendje të dehur, duke krijuar panik te banorët dhe te disa të mitur. Pas një konflikti të çastit dhe pretendimit se disa fëmijë po e bezdisnin, ai është kthyer në shtëpi, ka marrë një armë kallashnikov dhe ka shtënë në ajër, duke shkaktuar alarm.

Shërbimet e Policisë Selenicë, në bashkëpunim me Policinë Vlorë dhe Forcën Operacionale, pas ngjarjes, kanë zhvilluar kërkime të pandërprera për më shumë se 12 orë, në kushte të vështira malore dhe të pyllëzuara, duke lokalizuar dhe kapur autorin. Gjatë arrestimit, policia ka sekuestruar armën e zjarrit tip kallashnikov, me fishek në fole gati për qitje, që ai kishte përdorur për të qëlluar.

Materialet për këtë rast i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë për veprime të mëtejshme ligjore.