Drejtuesi i departamentit të Ekonomisë në Partinë Demokratike, Klodian Muço, theksoi se indeksimi i pensioneve në Shqipëri është shumë i ulët dhe nuk arrin më shumë se 1.5%, një rritje që ai e cilësoi të papërfillshme. Në një tryezë të organizuar nga opozita, Muço vuri në dukje se për këtë vit, në buxhetin e shtetit nuk është parashikuar ndihmë financiare për rreth 722 mijë pensionistë. Ai krahasoi këtë situatë me vendet e tjera të rajonit, ku pensionet kanë pasur rritje të konsiderueshme, duke arritur deri në 52%.

Muço theksoi shembujt e Kosovës, Malit të Zi dhe Serbisë, ku pensionistët kanë përfituar rritje të mëdha, ndërsa në Shqipëri, sipas tij, pensionistët janë lënë pas dore. “Sa i përket 722 mijë pensionistëve ata do të duhet të presin ardhjen e Partisë Demokratike pasi për ta, edhe pse kanë kaluar tashmë 10 vjet nga reforma e dështuar e pensioneve, përsëri qeveria u thotë prisni”, tha Muço, duke shtuar se edhe buxheti për vitin 2025 nuk parashikon rritje të ndjeshme për pensionet.