Në kuadër të hetimeve për korrupsion ndaj kryebashkiakut të Tiranës, Erjon Veliaj, dhe familjarëve të tij, Prokuroria e Posaçme (SPAK) ka ushtruar kontroll personal ndaj biznesmenit Elman Abule dhe gruas së tij, Marisa Nito. Hetimet kanë për fokus dyshimet për lidhje të ngushta mes këtyre individëve dhe Veliajt, si dhe përfshirjen e tyre në veprime korruptive.

Abule, përmes kompanisë së tij “Fidalba” shpk, ka përfituar leje për ndërtimin e një pallati në rrugën “Llambi Bonata” në Kombinat, leje të cilën e ka firmosur Veliaj. Hetuesit kanë zbuluar se Abule dhe gruaja e tij kanë kryer disa transaksione me Ajola Xoxën, bashkëshorten e Veliajt, e cila ka ofruar shërbime konsulence për çiftin Abule. Dyshohet se këto shërbime janë faturuar në mënyrë fiktive, dhe se ky aktivitet ka shërbyer për të kanalizuar paratë në sistemin bankar, me qëllim pastrimin e parave të dyshuara si të fituara nga aktiviteti kriminal i korrupsionit.

Prokuroria e Posaçme ka ngritur dyshime për një skemë të mundshme financiare të orkestruar për të fshehur origjinën e parave dhe për të përfituar nga lidhjet e afërta mes familjeve të përfshira në pushtetin lokal. Hetimet janë ende në zhvillim e sipër dhe priten hapa të mëtejshëm nga autoritetet.