Policia e Vlorës ka zbardhur dhe dokumentuar 6 raste vjedhjeje në kuadër të operacionit të koduar “Rulot”. Gjatë hetimeve, uniformat blu kanë arrestuar dy persona, Jemin Selamaj dhe Genci Goxhoj, si autorë të dyshuar të këtyre veprave kriminale.

Në datën 14 dhjetor 2024, ata dyshohen se kanë vjedhur një shumë prej 700 euro dhe 25,000 lekë në një banesë në fshatin Dukat, si dhe një rulot. Policia ka sekuestruar rulotin e vjedhur, që ishte gjetur i fshehur në banesën e njërit prej autorëve.

Hetimet kanë zbuluar se Selamaj dhe Goxhoj dyshohen edhe për 4 vjedhje të tjera, të kryera gjatë 3 muajve të fundit, përfshirë vjedhjen e disa koshereve të bletëve në Radhimë dhe Llogara, si dhe vjedhjen e disa bagëtive në Radhimë dhe Orikum. Policia po vijon hetimet për zbardhjen e plotë të veprave të tjera dhe identifikimin e autorëve të mundshëm.