Policia e Beratit ka arrestuar dy persona ditën e sotme, një prej të cilëve ishte shpallur në kërkim që prej tetorit 2023. Shtetasi A. B. D., 43 vjeç, banues në fshatin Pobrat, Dimal, ishte shpallur në kërkim pas një operacioni të koduar “Brothers” dhe për të ishte vendosur masa e sigurisë “Arrest në burg”. Ai akuzohet për veprat penale “Prodhimi dhe shitja e narkotikëve”, “Kultivimi i bimëve narkotike” dhe “Vjedhja e energjisë elektrike dhe impulseve telefonike”, në bashkëpunim. Gjatë operacionit të vitit 2023, në banesën e tij dhe të vëllait të tij u gjetën 50.8 kg kanabis dhe 240 rrënjë bimë narkotike.

Po gjatë operacionit, Policia ka arrestuar në flagrancë shtetasin R. M., 20 vjeç, banues në lagjen “Uznovë”, Berat, i cili dyshohet për shpërndarjen e lëndëve narkotike. Gjatë kontrollit, Policia ka sekuestruar një sasi kanabis, një përforcues grushti dhe një peshore elektronike. Materialet e këtij hetimi i kaluan Prokurorisë pranë Gjykatës së Shkallës së Parë të Juridiksionit të Përgjithshëm Berat për veprime të mëtejshme.