Kryeministri Edi Rama, gjatë një takimi me stafin ushtarak dhe civil shqiptar të angazhuar në strukturat e NATO-s në Bruksel, e cilësoi këtë grup si një arsye krenarie dhe një burim frymëzimi për Shqipërinë.
“S’do ma kishte rrokur imagjinata një grup të tillë kaq domethënës, duke marrë parasysh madhësinë e vendit tonë, me vajza e djem, gra e burra që kontribuojnë jo vetëm për misionin e Shqipërisë, por edhe në stafin ndërkombëtar të NATO-s,” tha Rama.
Ai vlerësoi faktin që këta shqiptarë janë zgjedhur për rolet e tyre falë meritokracisë dhe pa ndihmën e lidhjeve familjare apo politike, duke theksuar: “Këtu, e vetmja parti është partia e vlerave, demokracisë dhe lirisë.”
Më herët, Rama publikoi foto nga një takim me Sekretarin e Përgjithshëm të NATO-s, Mark Rutte, të cilin e cilësoi si një mbështetës të paepur të Shqipërisë.
Progresi në Procesin e Integrimit Europian
Kryeministri ndodhet në Bruksel për të udhëhequr delegacionin shqiptar në Konferencën e Tretë Ndërqeveritare me BE-në, ku Shqipëria ka hapur kapitullin e 6-të të negociatave, që lidhet me politikën e jashtme. Rama deklaroi se Shqipëria synon të përmbyllë negociatat e anëtarësimit në BE brenda vitit 2027.
Në vijim të axhendës së tij, nesër pritet që Rama të marrë pjesë në Samitin BE-Ballkani Perëndimor, ku në fokus do të jetë forcimi i partneritetit strategjik mes BE-së dhe rajonit. Samiti pritet të japë një mesazh të fortë politik për rëndësinë e këtij partneriteti në kontekstin aktual global dhe rajonal.
