Drejtuesi i Prokurorisë së Posaçme të Shqipërisë, Altin Dumani, dhe Kryeprokurori Special i Malit të Zi, Vladimir Novoviç, nënshkruan një Memorandum Mirëkuptimi që synon forcimin e bashkëpunimit mes dy institucioneve.

Në ceremoninë e nënshkrimit, z. Dumani theksoi përkushtimin e Prokurorisë së Posaçme (SPAK) për luftën kundër korrupsionit dhe krimit të organizuar, duke nënvizuar rëndësinë e shkëmbimit të informacionit dhe bashkëpunimit ndërkombëtar në këtë drejtim.

Nga ana tjetër, z. Novoviç vlerësoi punën dhe angazhimin e SPAK, duke veçuar hetimet e përbashkëta dhe ndihmën juridike si elementë kyç për suksesin e përbashkët. Ai gjithashtu propozoi ndarjen e eksperiencave në nivel ekspertësh për praktikat më të mira të institucioneve respektive.

Ky Memorandum paraqet një hap tjetër të rëndësishëm në thellimin e marrëdhënieve me institucionet ndërkombëtare të zbatimit të ligjit. Objektivi i tij është forcimi i luftës kundër krimit të organizuar, trafikimit të armëve, lëndëve narkotike dhe krimit kibernetik, që mbeten sfida të përbashkëta për rajonin.

SPAK, duke forcuar lidhjet strategjike me agjencitë ligjzbatuese rajonale, po shton efikasitetin në përballimin e këtyre sfidave, duke konfirmuar rolin e tij si një partner i besueshëm dhe aktiv në zbatimin e ligjit.