Kryeministri Edi Rama po merr pjesë në punimet e Samitit të Bashkimit Europian me Ballkanin Perëndimor, i cili po zhvillohet sot në Bruksel. Në fillim të samitit, Rama u prit nga presidentja e Komisionit Europian, Ursula von der Leyen, dhe presidenti i Këshillit Europian, António Costa.

Samiti ka si temë kryesore zgjerimin e Bashkimit Europian, duke përfshirë Ballkanin Perëndimor. Ndër temat që pritet të diskutohet janë Plani i Rritjes për Ballkanin Perëndimor, Plani Ekonomik dhe i Investimeve, si dhe Axhenda e Gjelbër dhe Digjitale për rajonin. Po ashtu, do të trajtohen edhe çështje të tjera si Politika e Përbashkët e Jashtme dhe e Sigurisë, luftimi i kërcënimeve hibride dhe kibernetike, dhe migracioni.

Diplomatët në BE kanë theksuar se ky samit do të ofrojë mundësinë për të diskutuar bashkëpunimin konkret në shumë fusha, nga ajo politike, mbrojtjes dhe sigurisë, deri tek energjia. Objektivi është që këto diskutime të ndihmojnë vendet e Ballkanit Perëndimor që të bëhen më shpejt gati për integrim në BE, të forcojnë ekonomitë e tyre dhe të rrisin stabilitetin rajonal, duke ndihmuar në zgjidhjen e mospajtimeve të brendshme.