Kryeministri i ri francez, François Bayrou, deklaroi në një intervistë për televizionin France 2 më 19 dhjetor 2024 se qeveria e tij duhet të jetë formuar para Krishtlindjeve. Bayrou theksoi se, nëse nuk arrihet formimi i qeverisë, do të jetë një moment vendimtar për Francën. Ai shtoi se Ministri i Brendshëm në detyrë, Bruno Retagio, duhet të mbetet pjesë e kabinetit të ri, për të siguruar vazhdimësi dhe stabilitet.
“Një dështim i kësaj qeverie do të jetë ndalesa e fundit para se të arrijmë në greminë,” tha Bayrou, duke theksuar rëndësinë e një qeverie funksionale. Ai gjithashtu shprehu shpresën që buxheti i ri të miratohet deri në mes të shkurtit, duke u munduar të shmangë fatin e paraardhësit të tij, Michel Barnier, i cili pati një qeveri të rrëzuar pas kritikave për masat e tij fiskale.
Bayrou theksoi se, nëse partitë opozitare përpiqen të bllokojnë buxhetin, ai do të jetë i gatshëm të përdorë klauzolën 49.3 të Kushtetutës franceze, e cila i jep mundësinë qeverisë të kalojë ligje pa miratimin e plotë të parlamentit. “Nuk do ta përdorim këtë mundësi nëse buxheti kalon pa pengesa,” tha ai.
Francois Bayrou, i cili ka një karrierë të gjatë politike dhe ka kandiduar në tri zgjedhje presidenciale, u emërua kryeministër nga presidenti Emmanuel Macron më 13 dhjetor 2024. Ai është lider i lëvizjes MoDem, një parti e cila është themeluar në qendër të spektrit politik francez.
