Një ngjarje tragjike ka ndodhur të dielën në jugperëndim të Turqisë, ku një helikopter është përplasur me një ndërtesë spitali. Helikopteri, që u ngrit nga Spitali i Muglasë, transportonte katër persona, përfshirë dy pilota, një mjek dhe një personel tjetër mjekësor, sipas deklaratës së Ministrisë së Shëndetësisë turke. Pas përplasjes, të katër pasagjerët humbën jetën.

Guvernatori i rajonit të Muglasë, Idris Akbiyik, tha për mediat se helikopteri goditi fillimisht katin e katërt të spitalit, para se të binte në tokë. Për fat të mirë, askush brenda ndërtesës nuk u dëmtua. Shkaku i aksidentit, i ndodhur gjatë mjegullës së dendur, është ende nën hetim nga autoritetet turke.

Pamjet nga vendi i ngjarjes treguan mbetje të helikopterit dhe grupe emergjencash që po punonin për të trajtuar situatën.