Një sulm i tmerrshëm me makinë ndodhi në një treg Krishtlindjesh në qytetin gjerman të Magdeburg, ku pesë persona humbën jetën dhe rreth 200 të tjerë u plagosën. I dyshuari për këtë akt, Abdulmohsen, ka një histori të gjatë profesionale si psikiatër. Ai ka punuar në një klinikë të specializuar rehabilitimi për kriminelët me varësi në Bernburg që nga marsi i vitit 2020. Abdulmohsen jetonte në një lagje të qetë pranë qendrës së Bernburgut, një qytet me 30,000 banorë.

Autoritetet gjermane kanë konfirmuar se ai nuk ishte i njohur si një islamist, megjithatë, ministrja e Brendshme Nancy Faeser theksoi se islamofobia e tij ishte “e qartë për t’u parë.” Prokurori lokal, Horst Nopens, sugjeroi se një faktor mund të ketë qenë “pakënaqësia e të dyshuarit me trajtimin e refugjatëve sauditë në Gjermani”, por motivet e sulmit ende mbeten të paqarta.

Taleb A. ishte i njohur në media, duke u shfaqur në intervista në vitin 2019 për të raportuar për punën e tij në ndihmën e arabëve sauditë që kishin kërkuar azil në Evropë, pas një periudhe në të cilën ai u bë ateist. Ai themeloi platformën wearesaudis.net dhe shprehu mbështetje për të djathtën ekstreme, duke përfshirë partinë AfD dhe miliarderin Elon Musk.