Një emigrant shqiptar 21-vjeçar, Denaldo Meta, është deklaruar fajtor për prodhimin dhe kultivimin e kanabisit në një fermë në Nottingham, pas një operacioni të policisë që ka zbuluar një ndërtesë të përdorur për këtë aktivitet të paligjshëm. Meta u arrestua më 26 nëntor gjatë një bastisjeje të realizuar nga forcat e rendit, të cilët zbuluan më shumë se 300 bimë kanabisi të kultivuara në një shtëpi në Wollaton Hall Drive, Lenton.

Meta është një emigrant i paligjshëm dhe avokatja e tij bëri të ditur në gjykatë se çdo dënim do të çonte në deportimin e tij në Shqipëri. Prokurori tha se ai kishte pasur një rol të vogël në operacion dhe kishte punuar në fermë për një periudhë të shkurtër kohore. Denaldo Meta u paraqit në Gjykatën e Nottingham Crown, ku seanca e ardhshme është caktuar për më 16 janar. Deri atëherë, ai do të qëndrojë në paraburgim.

Ky arrestim ndodhi pas një hetimi të realizuar nga policia e Nottingham, e cila kishte marrë informacion të vlefshëm nga anëtarë të publikut për aktivitetin e dyshuar të kultivimit të drogës. Inspektorja Liz Gaskin e ekipit të policisë së lagjes Qendrore të qytetit theksoi rëndësinë e këtij informacioni për të realizuar bastisjen dhe për të zbuluar aktivitetin kriminal.