Kryetari i Komisionit Qendror të Zgjedhjeve (KQZ), Kreshnik Radoniqi, ka deklaruar se moscertifikimi i Listës Serbe nuk ka bazë ligjore. Në një intervistë për Klankosova.tv, ai theksoi se aplikimi i Listës Serbe ka kaluar në filtrat e verifikimit të Zyrës për Certifikimin e Partive Politike, dhe pas verifikimeve, kjo ka rekomanduar certifikimin.
“Jo nuk ka bazë ligjore moscertifikimi, bazë ligjore ka certifikimi. Aplikimi i ka kaluar filtrat e verifikimit të Zyrës për Certifikimin e Partive Politike dhe pas krejt verifikimeve ka konstatuar se është në rregull dhe ka rekomanduar certifikimin”, tha Radoniqi
Radoniqi shtoi se çështjet që lidhen me Listën Serbe janë çështje që i takojnë organeve të drejtësisë dhe jo KQZ-së.
Lista Serbe nuk u certifikua për pjesëmarrje në zgjedhjet e 9 shkurtit, ku pro certifikimit ishte vetëm Radoniqi, ndërsa dy anëtarët e Lëvizjes Vetëvendosje (VV) ishin kundër, dhe anëtarët e partive të tjera nuk morën pjesë në votim.
