Një aksident i rëndë ka ndodhur mbrëmjen e së hënës në aksin rrugor “Levan-Tepelenë”, ku si pasojë e një parakalimi të gabuar, drejtuesi i mjetit ka humbur kontrollin dhe është përplasur me një automjet tjetër. Policia ka arrestuar në flagrancë 24-vjeçarin, banues në Fier, pasi dyshohet se shkaktoi aksidentin me parakalimin e gabuar. Si rezultat i përplasjes, katër persona kanë mbetur të lënduar, përfshirë drejtuesit e dy mjeteve dhe dy pasagjerët. Të lënduarit janë transportuar në spital dhe kanë marrë ndihmën mjekësore, ndërkohë që janë jashtë rrezikut për jetën.