Detaje të reja janë zbardhur në lidhje me plagosjen e një 50-vjeçari shqiptar në Greqi, i cili ka pësuar një sulm të dhunshëm në kryqëzimin e dy rrugëve të Athinës. Fillimisht, policia greke u njoftua për të shtëna me armë, dhe kur mbërritën në vendngjarje, ata zbuluan një shqiptar të plagosur rëndë, i cili ishte qëlluar disa herë me thikë. Ngjarja ka ndodhur në kryqëzimin e rrugëve “Voreadhon” dhe “Mouson”, ku katër persona kanë zbritur nga një automjet dhe një motor dhe kanë sulmuar viktimën. Ata e kanë goditur disa herë me thikë në bark, duke i shkaktuar plagë të rënda.

Pas këtij sulmi të egër, autorët janë larguar shpejt nga vendngjarja, duke hipur në mjetet e tyre, ndërkohë që i plagosuri, ndonëse i goditur rëndë, ka mundur të ecë disa metra përpara se të rrëzohej në tokë nga dhimbjet e shkaktuara nga plagët. I plagosuri është transportuar urgjentisht në spital për t’u mjekuar, ndërsa autoritetet policore kanë nisur hetimet për të zbardhur rrethanat e ngjarjes dhe për të identifikuar katër sulmuesit që qëlluan me thikë viktimën.