Elton Laska, Sekretar i Përgjithshëm i lëvizjes ‘Shqipëria Bëhet’, ka kritikuar SPAK për ngadalësimin e luftës ndaj krimeve zgjedhore, duke theksuar se ky fenomen është një nga shkaqet kryesore të korrupsionit dhe kriminalizimit të ekonomisë shqiptare. Laska ka ngritur shqetësimin lidhur me kërkesën e SPAK për dënimin me 1 vit burg për Edison Memollën, kryetarin e Bashkisë Rrogozhinë, i akuzuar për korrupsion aktiv në zgjedhje gjatë zgjedhjeve të pjesshme të 6 marsit 2022. Megjithatë, pavarësisht akuzave dhe hetimeve, Memolla vazhdoi të fitojë zgjedhjet e 14 majit dhe të konfirmohej në detyrën e tij në 23 korrik.
Laska shpreh dyshime të forta se Memolla ka përdorur burimet e administratës për të siguruar vota, duke shtuar se të mohosh këtë do të thotë të jesh naiv ose militant. Ai theksoi se SPAK duhet të tejkalojë “Manualin Memolla”, duke theksuar se krimi zgjedhor është rrënja e korrupsionit në Shqipëri dhe që përkeqësohet nga praktika të tjera si shpërblimet masive dhe aktivitete elektorale të kushtueshme.
Krimet zgjedhore: SPAK duhet të tejkalojë “Manualin Memolla”
SPAK ka kërkuar dënimin me 1 vit burg për kryetarin e Bashkisë Rrogozhinë, Edison Memolla, i akuzuar për “korrupsion aktiv në zgjedhje, kryer në bashkëpunim” gjatë zgjedhjeve të pjesshme të 6 marsit 2022. Megjithatë, pavarësisht hetimeve dhe akuzave ndaj tij, Memolla jo vetëm që mori pjesë, por edhe fitoi zgjedhjet e 14 majit dhe u konfirmua si kryetar në 23 korrik.
Është e vështirë të besohet se një politikan nën akuza të tilla nuk ka përdorur burimet e administratës për të siguruar vota. Të mohosh këtë do të thotë ose të jesh naiv, ose të përfaqësosh një qëndrim militant.
SPAK ka deklaruar se deri në vitin 2025 do të intensifikojë luftën kundër krimeve zgjedhore. Por shqetësimi kryesor është se këto angazhime shpesh duken të vonuara dhe mund të realizohen vetëm pasi të jenë konsumuar zgjedhjet e radhës, duke u lënë kohë autorëve për të përfituar nga krimet zgjedhore.
Krimi zgjedhor është rrënja e korrupsionit dhe kriminalizimit të ekonomisë në Shqipëri. Vota, që dikur blihej për 2,000 lekë në zgjedhjet e pjesshme në Korçë, tani ka arritur deri në 500 euro. Ky fenomen është përkeqësuar nga praktika të tjera si shpërblimet masive nga qeveria pak muaj para zgjedhjeve apo aktivitetet e kushtueshme të tipit “samite të diasporës,” të cilat kanë ndikime të dukshme elektorale.
SPAK nuk mund të qëndrojë indiferent ndaj një problemi kaq të rëndësishëm. Lufta ndaj krimeve zgjedhore është thelbësore për të garantuar procese demokratike dhe për të çliruar Shqipërinë nga pengmarrja e korrupsionit zgjedhor, që po vonon edhe integrimin europian të vendit. Është koha për veprime konkrete dhe të pakompromis.
