Gjykata e Fierit ka vendosur pezullimin nga detyra për dy mjekë, si dhe detyrimin për t’u paraqitur në policinë gjyqësore për një të tretë, pas akuzave për neglizhencë në trajtimin mjekësor që çoi në humbjen e jetës së një pacienti.

Prokuroria e Fierit njoftoi se procedimi penal nr. 181, i vitit 2022, është regjistruar për veprën penale “Neglizhenca në trajtimin mjekësor”, sipas nenit 96/2 të Kodit Penal.

Sipas hetimeve, më 3 shkurt 2022, shtetasi A.Sh. u paraqit në spitalin e Patosit me dhimbje gjoksi, u transferua në Spitalin Rajonal të Fierit dhe më pas u kthye në Patos, ku ndërroi jetë në një lokal. Mjekët në turn mohuan të kishin dijeni për rastin dhe praninë e pacientit në turnin e tyre.

Hetimet, mbështetur edhe në ekspertizën mjekoligjore, konstatuan elementë të qartë të neglizhencës që ndikonin drejtpërdrejt në pasojën fatale.

Gjykata e Fierit vendosi:

1.Pezullimin nga detyra për mjekun B.Dh.
2.Pezullimin nga detyra për mjeken I.Ç.
3.Detyrimin për t’u paraqitur në policinë gjyqësore për shtetasin K.J.

Ekzekutimi i masave është kryer nga policia gjyqësore më 25 dhjetor 2024. Prokuroria e Fierit shprehet e angazhuar për trajtimin e rasteve të neglizhencës mjekësore dhe mbrojtjen e jetës dhe shëndetit të pacientëve.