Kreu i Partisë Demokratike, Sali Berisha, gjatë një takimi me strukturat e degës së PD në Kamëz, ka ngritur akuza të forta ndaj kryetarit të Bashkisë së Tiranës, Erion Veliaj. Berisha e akuzoi Veliajn për korrupsion dhe pasuri të paligjshme, duke u ndalur veçanërisht tek stili i jetesës dhe shpenzimet luksoze të familjes së tij.

Berisha deklaroi se vetëm gardëroba e bashkëshortes së Veliajt, Ajola Xoxa, është vlerësuar në rreth 1 milion euro, një shumë që ai pretendon se është e pajustifikueshme. Ai theksoi se këto para janë pasuri e shqiptarëve dhe do të rikthehen tek qytetarët.

“Vetëm TVSH-ja e garderobës së Velicës janë gjetur 240 mijë euro fatura, çka do të thotë të paktën 1 milion euro gardëroba e fustaneve, jo e këpucëve. Sepse këpucët dhe çantat pastaj shkojnë firifiu,” deklaroi Berisha me ironi, duke nënvizuar se këto të dhëna janë të dokumentuara dhe të mbështetura nga fakte.

Katër akuza të rënda dhe projekte të dyshimta

Në vijim të fjalës së tij, Berisha u ndal në katër akuza të rënda ndaj Veliajt, për të cilat, sipas tij, kryebashkiaku nuk ka dhënë kurrë përgjigje. Ai përmendi çështjen e “djegësit të Tiranës” dhe projektin 5D, të cilët i cilësoi si skandale madhore financiare dhe abuzive.

“Erion Veliajn e akuzuan për katër akuza shumë të rënda, por asnjë fjalë për djegësin e Tiranës. Asnjë fjalë për 5D. Iku, por nuk e lëshojmë ne, se u jap fjalën e nderit që ato pasuri do t’u kthehen shqiptarëve,” u shpreh Berisha.

Lufta kundër korrupsionit dhe premtimi për ndryshim

Sali Berisha theksoi se Partia Demokratike është e vendosur për të luftuar korrupsionin dhe për të rikthyer çdo pasuri të vjedhur nga zyrtarët dhe grupet kriminale. Ai premtoi se këto çështje do të jenë prioritet absolut për opozitën dhe për çdo qytetar që kërkon drejtësi dhe transparencë.

“Ne shkojmë besimplotë, shkojmë ballëhapur tek çdo qytetar shqiptar. Shkojmë të vendosur për një dialog të sinqertë, me një program që i jep përgjigjen më të mirë interesave të secilit. Por edhe me denoncimin më të fuqishëm të këtij grupi hajdutësh që jo Shqipëria, por as Europa nuk i ka njohur kurrë më parë,” përfundoi ai.

Ky mesazh i fortë nga Sali Berisha vjen në një moment të rëndësishëm politik, ku debati mbi korrupsionin dhe abuzimet me fondet publike vazhdon të mbetet një nga shqetësimet kryesore të opinionit publik shqiptar.