Gjykata e Tiranës ka dënuar me 4 vite burg Tire Alldervishin, sanitaren e spitalit “Shefqet Ndroqi”, e cila gjatë periudhës së pandemisë së Covid-19, i zhvaste para pacientëve dhe familjarëve të tyre nën pretekstin e ofrimit të shërbimeve mjekësore. Megjithatë, duke marrë parasysh që ekzekutimi i dënimit për Alldervishin ka nisur nga data e arrestimit të saj, më 12 janar 2021, gjykata ka vendosur pezullimin e dënimit për 11 muajt e mbetur dhe ka urdhëruar që ajo të kalojë në shërbim prove për një periudhë 22 muajsh, me kusht që gjatë kohës së provës të mos kryejë asnjë vepër tjetër penale.

Në këtë rast, gjykata shpalli të pafajshme 6 infermierët e spitalit të përfshirë në hetime, përfshirë Mira Bushin, Sheqerije Koçin, Sidorela Çelën, Erjola Jazxhin, Gylbra Halilajn dhe Rukije Hoxhaj.

Skandali “Tire” u publikua për herë të parë në një emision investigativ në janar 2021, ku u zbulua se Alldervishi, duke u prezantuar si infermiere, kishte kërkuar dhe marrë para nga familjarët e pacientëve të shtruar në spitalin “Shefqet Ndroqi”, duke i premtuar shërbime mjekësore për ta. Një rast konkret ishte filmi i një vajze, e cila, pasi i kishte dhënë rreth 8 milionë lekë, pa arritur të shpëtonte nënën e saj që ishte me Covid-19. Pas vdekjes së pacientes, vajza denoncoi Alldervishin, dhe skandali doli në dritë.

Gjykata ka vendosur që Alldervishi të mos shoqërohet me persona të dënuar gjatë periudhës së provës, në përputhje me nenin 60/9 të Kodit Penal.