Helsinki — Harrojini aplikacionet e takimeve dhe rrëshqitjet pa fund në ekranet e telefonave. Në disa supermarkete në Finlandë, beqarët kanë gjetur një mënyrë shumë më të drejtpërdrejtë për të treguar se janë të hapur ndaj një njohjeje të re: ata thjesht marrin një shportë me ngjyrë rozë ose me mbishkrim të veçantë.
Siç raporton gazetat ndërkombëtare Daily Mail, këto shporta njihen në vend si “Sinkkukori”, që në finlandisht do të thotë fjalë për fjalë “shporta e beqarëve”. Personi që zgjedh këtë shportë blerjesh sinjalizon spontanisht te klientët e tjerë se është beqar dhe i hapur për të nisur një bisedë.
Nga një eksperiment i vitit 2015, te shpërthimi viral në rrjetet sociale
Fenomeni u bë viral pasi përdoruesja e rrjeteve sociale, Roya Fox, publikoi një video nga një supermarket finlandez. Videoja mblodhi miliona shikime brenda pak kohësh, duke bërë që kjo praktikë të diskutohet gjerësisht në mediat ndërkombëtare.
Megjithatë, koncepti nuk është plotësisht i ri. Transmetuesi publik kombëtar i Finlandës, Yle, raportoi që në korrik të vitit 2015 se supermarketi “K-Citymarket” në Kajaani kishte vendosur shporta portokalli me mbishkrimin “Sinkkukori”. Eksperimente të ngjashme janë dokumentuar edhe në supermarkete të tjera si ai në Ison Omena në Espoo.
Si funksionon “Sinkkukori”?
Mekanizmi është mjaft i thjeshtë dhe eviton pasigurinë e njohjeve të para:
Sinjalizimi i qartë: Në vend që të hamendësoni nëse dikush është i zënë apo i lirë, ngjyra ose mbishkrimi i shportës shërben si një dritë e gjelbër.
Iniciativë vullnetare: Mbajtja e shportës rozë tregon se personi është i hapur për ndërveprime spontane ballë për ballë gjatë kohe që bën blerjet e përditshme.
Edhe pse nisma nuk është shtrirë në mënyrë të detyrueshme në çdo supermarket të vendit, koncepti vazhdon të ngjallë humor dhe interes të madh. Ndërsa disa e shohin si mënyrën ideale për të rikthyer komunikimin real njerëzor, të tjerë mbeten ende skeptikë mbi efektivitetin e saj praktik.