Drejtori i Përgjithshëm i linjës ajrore Jeju Air, Kim E-bae, ka kërkuar falje publike për familjet e viktimave të aksidentit ajror të ndodhur në Korenë e Jugut, i cili la 122 të vdekur. Gjatë një konference të shkurtër për media, Kim dhe drejtues të tjerë të kompanisë u shfaqën me kokat ulur, duke shprehur ngushëllimet e tyre për tragjedinë.

Në deklaratën e tij, Kim tha se prioriteti kryesor tani është mbështetja për familjet e të ndjerëve. “Ne në Jeju Air ulim kokën në shenjë falje për të gjithë ata që u dëmtuan në këtë incident në aeroportin Muan. Ne do të bëjmë gjithçka që mundemi për t’iu përgjigjur incidentit. Na vjen keq për shqetësimin,” theksoi ai.

Shkaku i aksidentit ende nuk është zbuluar, por mediat lokale raportojnë se një goditje zogjsh mund të ketë shkaktuar problemet në sistemin e avionit. Ky është aksidenti i parë fatal në historinë e Jeju Air, një linjë ajrore e njohur me kosto të ulët, e themeluar në vitin 2005. Incidenti është një nga më të vdekjeprurësit në Korenë e Jugut.