Dy automjete luksoze, një BMW X6 dhe një Range Rover, janë bllokuar nga Policia Kufitare e Malit të Zi, pasi për to rezultonin urdhër-arreste ndërkombëtare nga Interpol Gjermania dhe Interpol Zvicra.

Në pikën kufitare të Bozhajt, në hyrje të Malit të Zi, autoritetet ndaluan një automjet tip Range Rover, i drejtuar nga shtetasi shqiptar A.D. Pas verifikimeve, rezultoi se ky automjet ishte shpallur në kërkim nga Interpol Zvicra.

Ndërkohë, në pikën kufitare të Draçenovcit, u ndalua një tjetër automjet luksoz, një BMW X6, i cili drejtohej nga E.A., një 27-vjeçar nga Serbia. Edhe ky automjet rezultoi i shpallur në kërkim ndërkombëtar nga Interpol Gjermania.

Autoritetet malazeze po vijojnë hetimet në bashkëpunim me Interpolin për të zbardhur plotësisht origjinën dhe rrethanat e përfshirjes së këtyre mjeteve në aktivitete të paligjshme. Automjetet janë sekuestruar, ndërsa drejtuesit janë vënë në dispozicion të organeve përkatëse për hetime të mëtejshme.