Gjykata italiane e Kasacionit ka marrë një vendim kyç lidhur me çështjen e ndalimit të emigrantëve në Shqipëri, pas apelimeve të bëra nga qeveria italiane ndaj vendimeve të mëparshme të Gjykatës së Romës, të cilat kishin rezultuar në dështime për të vërtetuar ligjshmërinë e këtij procesi.

Në vendimin e saj, Gjykata e Kasacionit nënvizon se:
“Për përcaktimin e vendeve të sigurta, gjyqtari, i cili garanton në shqyrtimin e çështjes individuale efektivitetin e të drejtës themelore për lirinë personale, nuk zëvendëson vlerësimin që në përgjithësi është përgjegjësi vetëm e ministrit të Punëve të Jashtme dhe ministrave të tjerë të pranishëm në qeveri.”

Ky vendim thekson se vlerësimi për “vende të sigurta” është një përgjegjësi politike dhe administrative, dhe jo një çështje për të cilën duhet të vendosë gjyqtari në raste individuale.

Gjykata e Kasacionit ka vendosur gjithashtu pezullimin e të gjitha masave deri në një vendim përfundimtar nga Gjykata e Drejtësisë së Bashkimit Evropian (GJED). Ky pezullim ka për qëllim të sigurojë koherencë ligjore dhe respektim të standardeve të BE-së për të drejtat e njeriut dhe trajtimin e emigrantëve.

Në një dokument prej 35 faqesh, gjyqtarët kanë sqaruar se vendimi i tyre nuk është një “udhëzim detyrues” për rastet e ardhshme, por një kontribut për dialogun ndërmjet juridiksioneve në frymën e bashkëpunimit të ndërsjellë dhe besnik midis institucioneve gjyqësore kombëtare dhe atyre evropiane.

Ky vendim pritet të ketë implikime të rëndësishme për marrëveshjet mes Italisë dhe Shqipërisë në lidhje me menaxhimin e emigracionit dhe të drejtat e refugjatëve.