Kryetari i Partisë Demokratike, Sali Berisha, ka përcjellë një mesazh urimi për të gjithë shqiptarët në prag të ndërrimit të viteve, përmes një video-mesazhi të publikuar në TikTok.

“Nga zemra ju uroj, kudo që jeni: në familjet tuaja, mes miqve, në udhëtime, apo në spitale dhe institucione, një Vit të Ri 2025 me shëndet, begati dhe gëzim,” tha Berisha në urimin e tij.

Në mesazhin e tij, Berisha theksoi se viti 2025 do të jetë një vit i ndryshimeve të mëdha, duke përmendur inaugurimin e Presidentit të ri të SHBA-ve, Donald Trump, dhe ndikimin e këtyre zhvillimeve në mbarë botën.

Berisha vuri theksin në sfidat me të cilat përballet Shqipëria, përfshirë emigracionin masiv, varfërinë, pasigurinë dhe mungesën e perspektivës për të rinjtë, duke bërë thirrje për bashkim dhe mobilizim për rotacionin politik më 11 maj.

“Shqipëria nuk mund të jetë më vendi i pasigurisë, varfërisë dhe dhunës politike. Shqipëria duhet të jetë vendi i lirive, i dinjitetit dhe i integrimit në Bashkimin Europian,” tha ai.

Berisha ftoi shqiptarët të krijojnë një front të gjerë për ndryshim, duke kujtuar 20-vjetorin e ardhjes së dytë të Partisë Demokratike në pushtet si një moment reflektimi dhe mobilizimi.

“Është radha jonë! Është radha jonë! Është radha jonë!” përfundoi Berisha mesazhin e tij, duke shprehur besimin në një të ardhme më të mirë për Shqipërinë.

“Gëzuar Vitin e Ri 2025! Fitore!” – përfundoi ai urimin e tij festiv.