Bota e futbollit mban frymën, më në fund pas një viti pritje dhe mes shumë dyshimeve, “Euro2020” starton këtë të premte. Ky nuk është një turne si gjithë të tjetër, nuk mund të jetë kurrë për sa kohë stadiumet nuk do të jenë plotë, të paktën jo pjesa e tyre më e madhe, nuk pritet të jetë një turne normal për sa kohë hijet e COVID-19 vijojnë të jenë prezent dhe kanë lënë gjurmë të mëdha pas një viti asfiksues për çdo lojtarë. Nuk është e lehtë të flitet për një futboll normal në kushte jo normale por ky turne është një sinjal i parë se bota po i rikthehet normalitet.
Për herë të parë në histori, që nga krijimi, një evropian shtyhet, por ky është vetëm detaji i parë, pasi për herë të parë ekipet përfaqësueses grumbullojnë 26 lojtarë. Për herë të parë në një Evropian do të kryhen 5 zëvendësime dhe nëse ndeshja shkon në shtesë, 6 të tilla. Për herë të parë në Evropian do të aplikohet edhe sistemi VAR.
Risia tjetër e këtij Evropiani është shpërndarja në 11 shtete të ndryshme, duke nisur që nga Roma, San Petersburg i Rusisë e Baku i Azerbajxhanit, për të vijuar në Sevilla, Mynih, e të tjerë qytete për të përfunduar në Wembly të Londrës, ku do të luhet edhe finalja e madhe.
Mijëra km të përshkruara nga përfaqësueset në fluturime të dedikuara, disa prej tyre pritet të qëndrojnë më shumë në ajër si Zvicra do të udhëtojë plot 10 mijë km, ndërsa përfaqësuese si Italia, Holanda, Anglia, Spanja dhe Gjermania nuk do të udhëtojnë, pasi i luajnë të 3 ndeshjet e grupit në shtëpi.
Të parashikosh në futboll shpesh është e vështirë aq më tepër në një turne të tillë, e ka bërë diçka të tillë Observatori i Futbollit, duke përfshirë në statistika, vlerën e lojtarëve, moshën etj. Në këtë klasifikim të veçantë, favorite shihet Franca, e ndjekur nga Gjermania, Spanja dhe Anglia. Në të njëjtën pikë bashkohet edhe kompanitë e basteve, Franca shihet si favorite ku suksesi i “gjelave” kuotohet me 5,5 e ndjekur nga Anglia me 6 dhe Belgjika 6,5.
