Në një hap novator për industrinë e mobiljeve dhe mjedisin, një kompani në Melburn të Australisë ka zhvilluar krevatin e parë në botë të bërë tërësisht nga plastika e ricikluar. Ky shpikje, e cila mund të revolucionarizojë mënyrën si flemë dhe ndihmon në reduktimin e mbetjeve plastike, është e thjeshtë për t’u montuar dhe ofron një zgjidhje efektive për një problem të madh mjedisor.

Sipas shpikësit John Stehle, “Brenda 60 minutash mund të montoni një krevat”, duke e krahasuar procesin me ndërtimin e një lodre LEGO. Ky produkt është një hap i parë i rëndësishëm në Australi dhe mund të ketë ndikim të madh në botë, duke ndihmuar në zgjidhjen e problemit të mbetjeve plastike dhe të forta që krijohen nga produktet e tilla si krevatet dhe dyshekët.

Matt Genever, shef i “Sustainability Victoria”, e cilëson këtë shpikje si një zgjidhje fantastike për problemin e mbetjeve plastike, duke theksuar se në Australi çdo vit hidhen rreth 1,8 milionë dyshekë dhe qindra mijëra korniza krevatesh. Këto produkte, që zakonisht përfundojnë në landfille, mund të riciklohen dhe të përdoren për të ndërtuar shtretër të rinj.

Këta shtretër janë testuar në mjedise të ndryshme, përfshirë komunitete të vogla, qendra studentore dhe sportistë nga “Melbourne Storm Academy”. Rezultatet e provave kanë treguar se këta shtretër janë të qëndrueshëm dhe mund të mbajnë një peshë deri në 140 kilogramë, ndërkohë që kanë një jetëgjatësi prej 10 vitesh. Pas përdorimit, ato mund të riciklohen përsëri dhe të prodhohen sërish.

Shpikësit shpresojnë që ky produkt të shërbejë si model për krijimin e llojeve të tjera mobiliesh të qëndrueshme, duke u mundësuar konsumatorëve të kontribuojnë në mbrojtjen e mjedisit dhe të krijojnë një cikël të qëndrueshëm përdorimi dhe riciklimi të materialeve plastike.