Gjykata e Rodosit ka vendosur që Aleksandër Luca, një nga autorët e vrasjes dhe përdhunimit të 21-vjeçares Eleni Topaloudi, duhet t’i paguajë një dëmshpërblim prej 905 mijë euro familjes së viktimës. Vendimi është marrë për të kompensuar dëmin psikologjik, ankthin dhe dhimbjen e shkaktuar ndaj të afërmve të saj.

Ngjarja tragjike
Krimi ndodhi në nëntor 2018 në Pefkos Lindos, ku Eleni Topaloudi, një studente greke, u përdhunua dhe u torturua për tre orë nga Aleksandër Luca dhe një shtetas grek, Manolis Koukouras. Pasi tentuan të pastronin vendin e krimit, dy autorët e çuan Elenin në një vend të izoluar dhe e hodhën nga një shkëmb në det ndërsa ajo ishte ende gjallë, duke i shkaktuar vdekjen.

Të dy autorët u dënuan më parë me burgim të përjetshëm për këtë akt brutal.

Vendimi i gjykatës
Familja e Eleni, përmes një padie civile, kërkoi dëmshpërblim për dhimbjen dhe vuajtjet që krimi i ka shkaktuar. Gjykata e Rodosit ka pranuar kërkesën e familjes dhe ka përcaktuar pagesat që duhet të bëjë Aleksandër Luca:
– 240,000 euro për babain, Ioannis Topaloudis
– 240,000 euro për nënën, Kyriaki Armoutidou
– 200,000 euro për vëllain e Eleni Topaloudit
– 100,000 euro për gjyshen e Eleni Topaloudit
– 100,000 euro për trashëgimtarët e gjyshit të Eleni Topaloudit
– 25,000 euro për secilin nga dajat e Eleni Topaloudit

Gjykata rrëzoi padinë ndaj shtetasit grek Manolis Koukouras, duke vendosur përgjegjësinë civile mbi Aleksandër Luca.
Padia civile nxjerr në pah brutalitetin dhe metodologjinë me të cilën u krye krimi, si dhe përpjekjet për të fshehur gjurmët e tij. Ky vendim përbën një hap drejt kompensimit për dhimbjen e pamasë të familjes së Eleni Topaloudit, megjithëse tragjedia e humbjes së saj mbetet e pashlyeshme.