Kompania “Blue Origin” e miliarderit Jeff Bezos ka shënuar një arritje historike këtë mëngjes në industrinë e hapësirës me fluturimin e parë të suksesshëm të raketës së saj New Glenn. Fluturimi, i cili u realizua nga Florida, është një hap i rëndësishëm për kompaninë, e cila synon të sfidojë dominimin e SpaceX në industrinë e lançimeve të satelitëve.

Raketa është emëruar pas astronautit të njohur John Glenn dhe ka kaluar kufirin ndërkombëtar të hapësirës, vijën Kármán. Suksesi u njoftua nga shefi ekzekutiv i “Blue Origin”, Dave Limp, në një postim në X. Kompania gjithashtu konfirmoi se faza e dytë e raketës dhe ngarkesa e saj janë tani në orbitë.

Fluturimi i raketës New Glenn, i cili ka një pjesë të ripërdorshme që mund të përdoret për lançime të ardhshme, shënon një hap të rëndësishëm në përpjekjet e Bezos për të konkurruar me Elon Musk dhe SpaceX, duke përdorur teknologjinë e ripërdorshme për të ulur kostot dhe për të rritur efikasitetin.