Rudina Gërdani mësohet se është edukatorja e cila është shpallur në kërkim pas denoncimit për dhunë ndaj fëmijëve, të bërë nga dy prindër të cilët kishin zgjedhur kopshtin privat “Gledis” për fëmijët e tyre. Në një video të publikuar, shihet një rast kur edukatorja Rudina Gërdani fillimisht i bën një foto një fëmije për ta publikuar në rrjetin social të kopshtit dhe më pas e godet me shuplakë. Por kjo nuk është hera e parë, teksa në një tjetër video djali goditet nga pas koke po nga edukatorja.

Rudina Gërdani është denoncuar në polici nga babai i 3-vjeçarit, Lorenc Rrapa, i cili ka treguar për dhunën e përsëritur ndaj djalit të tij. I ftuar në emisionin “People”, ai ka treguar se fillimisht e kanë kuptuar që diçka nuk shkonte kur fëmija ka refuzuar të shkojë në kopsht.

“Momenti i parë ka qenë data 20. Kur u nisëm për të çuar Priamin në kopsht, ai nuk pranoi. Unë vendosa ta mbaja në shtëpi që të qëndronte me familjen. Në darkë, kur nusja i bëri dush, vuri re një shenjë në krahun e majtë. Ishte pak i nxirë. E pyeti çfarë kishte ndodhur dhe ai u përgjigj ‘mos e prek, vetëm puçe, më ka kapur Rudi’,” – ka treguar Lorenc Rrapa.

Babai i vogëlushit thotë se në fillim nuk e kishte marrë shumë seriozisht, por më pas e ka pyetur sërish djalin për të njëjtën shenjë dhe ai i ka dhënë të njëjtën përgjigje. Pas kësaj, ai ka telefonuar drejtoreshën dhe pronarin e kopshtit, duke i kërkuar që të kontrolloheshin kamerat e sigurisë.

I shkrova një mesazh drejtoreshës: ‘Shpresoj mos të jetë e vërtetë ajo që po më thotë fëmija, ai ndjehet i dhunuar dhe po përmend emrin e edukatores’. Drejtoresha më tha se do shikonin kamerat. Të nesërmen, kur shkuam në kopsht, Priami nuk pranoi të hynte brenda. E morëm me vete dhe pamë kamerat në një lokal bashkë me drejtoreshën. Aty konstatova se dhuna ishte e përsëritur. Brenda një periudhe kohore prej rreth 2 orësh, të paktën dy fëmijë ishin dhunuar. Gjatë vëzhgimit të kamerave kam parë tre momente dhune,” – ka treguar ai.

Në videon e regjistruar nga kamerat e sigurisë shihet qartë se si edukatorja fillimisht u bënte foto fëmijëve për t’i publikuar në rrjetet sociale të kopshtit, por më pas i godiste me shuplakë në fytyrë apo nga pas koke.

Pas publikimit të videos, edukatorja është pushuar nga puna nga pronari i kopshtit dhe është shpallur në kërkim nga policia. Policia e Tiranës ka njoftuar se janë referuar materialet në Prokurori dhe se po punohet për kapjen e 46-vjeçares Rudina Gërdani.

Ngjarja ka shkaktuar shqetësim të madh në publik, veçanërisht tek prindërit që kanë fëmijët e tyre në kopshte private. Shumë qytetarë kanë reaguar në rrjetet sociale, duke kërkuar ndëshkimin e edukatores dhe kontrolle më të rrepta në institucionet e kujdesit për fëmijët.