Gjatë fjalës së saj në protestë, ekspertja për çështje ndërkombëtare, Ilda Zhulali, theksoi një propozim të bërë para dy vitesh nga ajo dhe deputeti Këlliçi, ku ata propozuan autobusë falas si një zgjidhje për të ulur koston e shpenzimeve të qytetarëve të Tiranës. Zhulali e kritikoi Veliajn për refuzimin e këtij propozimi, duke thënë se ai, kur ndihej i fuqishëm, tha se nuk mund të implementohej autobuzi falas, duke sjellë një ekspert që argumentoi se ky shërbim ishte i pamundur për qytetarët e Tiranës.

“Çfarë bëri Veliaj, se ndihej i fuqishëm atëherë? Nuk bëhet, tha autobuzi falas, na solli një ekspert që të na thoshte se nuk ka autobus falas për banorët e Tiranës, mirëpo tani që u shtrëngua litari në fyt, tha se do e bëj autobusin falas vetëm për pensionistët, edhe pse po i poshtëron në ato radhët atje, ky është Veliaj”, u shpreh Zhulali.

Ajo theksoi se Veliaj ka përjashtuar gratë, të cilat sipas saj e përdorin më shpesh autobuzin, dhe janë ata që për shkak të detyrave kanë më shumë nevojë për transportin publik. “Ka përjashtuar gratë, të cilat e përdorin më shpesh autobuzin, edhe pse për shkak të detyrave janë ata që e përdorin më së shumti, janë të përjashtuara nga autobusi falas”, shtoi Zhulali.

Zhulali e kritikoi qeverinë për politikat e saj, duke thënë se Veliaj nuk ka para për gratë, pasi ato para duhet t’i çohen tek inceneratorët fantazëm dhe tek drejtorët e 5D, duke i futur ato në xhepin e tij. Ajo shtoi se kjo është një qeveri që përjashton qytetarët nga shërbimet bazë, ndërkohë që financohet me skandale korruptive.

“Mirëserdhët në protestën e 43-të, përpara ambjenteve ku rri ende pronari faktit i inceneratorit fantazëm dhe shoku i hajdutëve 5D që do e heqim nga detyra”, tha Zhulali gjatë fjalës së saj. Ajo theksoi se kjo protestë është një mesazh i qartë për të kërkuar llogari nga ata që janë përgjegjës për keqadministrimin e Bashkisë së Tiranës dhe të gjithë Shqipërisë.

Përfundimisht, Zhulali ftoi qytetarët të qëndrojnë të angazhuar dhe të mbështesin protestat për të sjellë ndryshimin e duhur dhe për të larguar ata që, sipas saj, kanë përfituar nga korrupsioni dhe keqmenaxhimi i fondeve publike.