Zbardhen detaje të reja nga ekzekutimi i Lulzim Vishës, 48-vjeçarit i cili u gjet i pajetë brenda automjetit të tij. Policia ka bërë të ditur se në fshatin Zgafnor, në Zall-Herr, është gjetur një makinë e djegur tip “Porsche”, e dyshuar si mjeti i përdorur nga autorët e krimit.

Sipas njoftimit zyrtar të policisë, brenda automjetit është zbuluar një armë e gjatë zjarri, që dyshohet të jetë arma e përdorur në vrasje. Gjithashtu, targat e makinës së djegur rezultojnë të jenë të vjedhura që në prill të vitit 2023 në zonën e Kamzës.

Grupi i posaçëm hetimor vijon punën intensive për identifikimin dhe kapjen e autorëve, si dhe për zbardhjen e plotë të rrethanave të ngjarjes. Autoritetet po analizojnë të gjitha provat e mbledhura për të hedhur dritë mbi këtë ekzekutim, ndërsa nuk përjashtohet mundësia që ngjarja të jetë e lidhur me larje hesapesh mes grupeve kriminale.