Një 32-vjeçar i shpallur në kërkim ndërkombëtar nga autoritetet italiane është arrestuar nga policia e Durrësit pas një operacioni të koduar “Latitant”. Erjon Meshi, i njohur gjithashtu me emrin Arjon Mema, ishte shpallur në kërkim për trafikim narkotikësh dhe përfshirje në një grup kriminal që merrej me prodhimin, shpërndarjen dhe shitjen e lëndëve narkotike.

Operacioni i realizuar nga Sektori i Qarkullimit Rrugor dhe shërbimet e Forcës së Posaçme Operacionale të DVP Durrës u zhvillua pas shkëmbimit të informacioneve të siguruara nga inteligjenca policore dhe bashkëpunimit të ngushtë ndërmjet Interpol Tirana dhe Interpol Roma.

Meshi, i cili është dënuar nga gjykata e Trentos në Itali, u arrestua për t’u ekstraduar në shtetin fqinj, ku është akuzuar për dy vepra penale: “Mbajtje të paligjshme, shitje, prodhim, shpërndarje dhe trafikim i lëndëve narkotike” dhe “Pjesëmarrje në grup kriminal me qëllim trafikimin e lëndëve narkotike”.

Ky arrest është një tjetër sukses i bashkëpunimit ndërkombëtar të forcave të rendit në luftën kundër trafikimit të narkotikëve dhe krimit të organizuar. Aktualisht, autoritetet shqiptare po punojnë për ekstradimin e tij në Itali.