Deklaratat e Presidentit të SHBA, Donald Trump, mbi mundësinë e kontrollit të Groenlandës kanë vazhduar të shkaktojnë reagime të forta në nivel ndërkombëtar, duke u bërë një temë e nxehtë në takimet e nivelit të lartë të Bashkimit Evropian (BE).

Kryeministrja daneze, Mette Frederiksen, gjatë një vizite në Gjermani, zhvilloi një takim me Kancelarin gjerman, Olaf Scholz, ku u diskutua ky çështje. Edhe pse ideja e Trump për Groenlandën nuk u përmend drejtpërdrejt nga të dy liderët, Scholz theksoi rëndësinë e respektimit të kufijve dhe të paprekshmërisë së tyre, duke e lidhur këtë me parimin themelor të së drejtës ndërkombëtare. “Paprekshmëria e kufijve është një parim themelor i së drejtës ndërkombëtare. Kufijtë nuk duhet të zhvendosen me forcë,” theksoi Scholz, duke iu referuar agresionit rus ndaj Ukrainës dhe mbështetjes për Kievin në mbrojtjen e sovranitetit të tij.

Në anën tjetër, Kryeministrja Frederiksen u shpreh se Evropa po përballet me një “realitet më të pasigurt”, duke shtuar se ky kontekst kërkon një bashkëpunim më të fortë brenda BE-së. “Ne kemi nevojë për një Evropë më të fortë dhe më të vendosur që qëndron gjithnjë e më shumë në të drejtën e saj,” tha Frederiksen, duke theksuar nevojën për një angazhim të shtuar të BE-së për sigurinë dhe mbrojtjen e interesave të saj.

Ndërkohë, Danimarka ka njoftuar se do të financojë rreth 2.4 miliardë euro për zhvillimin e Groenlandës, një krahinë autonome, por që bën pjesë në mbretërinë daneze. Kjo pasqyron përpjekjet e Danimarkës për të forcuar pozitat e saj në rajonin Arktik dhe për të mbrojtur interesat e saj në një periudhë të pasigurt gjeopolitike.

Në një tjetër zhvillim, liderët e Bashkimit Evropian do të mbajnë samitin e tyre të parë të hënën e ardhshme për të diskutuar financimin dhe zhvillimin e aftësive të reja ushtarake, një hap i rëndësishëm për forcimin e mbrojtjes së Evropës në një kohë pasigurie ndërkombëtare.