Salwan Momika, aktivisti irakian i njohur për djegien publike të Kuranit në Suedi, është vrarë me armë zjarri në Södertälje, pranë Stokholmit. Ngjarja ka ndodhur mbrëmjen e 29 janarit, teksa Momika ishte duke transmetuar drejtpërdrejt në TikTok.

Sipas autoriteteve suedeze, Momika u gjet i pajetë në apartamentin e tij pas të shtënave me armë. Policia ka nisur një operacion të gjerë hetimor dhe deri tani ka arrestuar pesë persona të dyshuar në lidhje me vrasjen. Sipas mediave suedeze, autoritetet po shqyrtojnë mundësinë e përfshirjes së një “fuqie të huaj” në këtë ngjarje.

Momika ishte një figurë e njohur për aktet e tij provokuese, përfshirë djegien e Kuranit para xhamisë së Stokholmit dhe ambasadës irakiane, duke shkaktuar reagime të ashpra ndërkombëtare. Ai ishte nën proces gjyqësor për krime të urrejtjes dhe pritej të përballej me një vendim gjyqësor më 31 janar.

Policia suedeze vijon hetimet për zbardhjen e plotë të rrethanave të ngjarjes.