Kryetari i Partisë Demokratike, Sali Berisha, ka akuzuar përmes një postimi në rrjetet sociale drejtoreshën e platformës së Komisionit Qendror të Zgjedhjeve (KQZ), duke e cilësuar atë si bashkëpunëtore në një “akt kriminal”.

Sipas Berishës, të dhënat e emigrantëve që janë regjistruar për të votuar përmes platformës së KQZ-së janë keqpërdorur për qëllime politike nga ministrja Belinda Balluku. Ai pretendon se emigrantët shqiptarë në Itali kanë marrë telefonata nga përfaqësues të Partisë Socialiste, të cilët u kanë kërkuar të marrin pjesë në një takim me Ballukun më 2 shkurt në Milano.

“Keqpërdorim kriminal i të dhënave të platformës së KQZ-së nga Lubi Balluku. Drejtoresha militante e PS-së vjedh të dhënat e PER për Lubi Ballukun! Dënoj me forcën më të madhe këtë akt kriminal të bashkëpunëtores në krim të Lubi Lotit në KQZ,” shkruan Berisha.

Ai gjithashtu u bëri thirrje emigrantëve shqiptarë në Milano që të protestojnë kundër Ballukut.

Për të mbështetur akuzat e tij, Berisha publikoi edhe një mesazh të një emigranti, i cili pretendon se ka marrë një telefonatë nga ekipi i Ballukut, pasi kishte regjistruar të dhënat e tij në platformën e votimit nga jashtë.

Ky denoncim ka ngritur shqetësime mbi sigurinë e të dhënave personale dhe mënyrën se si ato po përdoren nga partitë politike në prag të zgjedhjeve. Deri më tani, nuk ka pasur një reagim zyrtar nga Belinda Balluku apo institucionet përkatëse lidhur me këto pretendime.