Një akt vandalizmi ka ndodhur pasditen e sotme në Kishën “Ngjallja e Krishtit” në Ksamil. Sipas At Pandelit, përfaqësues i këtij objekti kulti, ngjarja ka ndodhur kur kujdestari i kishës ka shkuar për të mbyllur dyert dhe ka hasur në dy persona të dyshimtë.
Njëri prej tyre ndodhej brenda kishës dhe po dëmtonte ikonat dhe objektet e tjera të kultit, ndërsa tjetri mbante rolin e rojës jashtë. Pasi kanë vënë re kujdestarin, të dy janë larguar me shpejtësi, madje duke e kërcënuar atë.
Pas njoftimit të kujdestarit, policia ka ndërhyrë menjëherë dhe ka kapur dy të dyshuarit pranë një stacioni autobusësh. Ata po merren në pyetje për të zbardhur motivet dhe rrethanat e këtij akti të rëndë.
