Beyoncé ka shkruar histori në edicionin e 67-të të Grammy Awards, duke fituar për herë të parë në karrierën e saj çmimin prestigjioz “Albumi i Vitit”. Albumi i saj “COWBOY CARTER”, një përzierje e zhanreve country, pop, rap dhe hip-hop, u shpall fitues gjatë ceremonisë së mbajtur në Crypto.com Arena në Los Anxhelos.

Me këtë fitore, Beyoncé u bë gruaja e parë me ngjyrë që merr këtë çmim që nga Lauryn Hill në vitin 1999, duke shënuar një moment historik në industrinë e muzikës. Gjatë fjalimit të saj, ajo falënderoi të gjithë bashkëpunëtorët, kompozitorët dhe producentët që kontribuan në suksesin e albumit.

“Thjesht ndihem shumë e nderuar. Kanë kaluar shumë e shumë vite dhe dua vetëm të falënderoj Grammy-t, çdo kompozitor, çdo bashkëpunëtor, çdo producent për gjithë punën e palodhur,” – u shpreh ajo, ndërsa kishte pranë vajzën e saj Blue Ivy.

Beyoncé ia dedikoi këtë fitore pioniereve të muzikës country, veçanërisht Linda Martell, e cila ka qenë një figurë kyçe në këtë zhanër. “Shpresoj që ne të vazhdojmë të shtyjmë përpara, duke hapur dyert,” – shtoi ajo.

Fitorja e Beyoncé në këtë kategori erdhi pas disa nominimeve të mëparshme, duke e bërë momentin edhe më emocionues për fansat e saj në mbarë botën.